Rev 7 | WRS | STEP | Sismba kava nongalvna samblasambla ovsongolnindm, lovahliangavna pethamulla pethara. Himba vuvim olla numthuvna, dalohvnamba pethara wanplombra eva tira sena.

Revelation of John 7

144,000Pelara Israelnindva Mara Os Khuapranama Hevmba Sesoana Moanamba.

1 Sismba kava nongalvna samblasambla ovsongolnindm, lovahliangavna pethamulla pethara. Himba vuvim olla numthuvna, dalohvnamba pethara wanplombra eva tira sena. 2 Wo kava henga mongom nonglavna ovsongolnindrinim, okomba pholsisrini provna. Honamba ovsongolnindriniva wulluhvna mana vema hevna englana, indhanam kulohowolalm nonam, osm memba Sesoana, nomba temba wohavpa osangasva. Wo doa hev mindnam ishonga vinna nom samblasamblam ovsongolnindm. Memba noi samblasamblava ovsongolnindva, ten Sesoa doara vinnam, daswolnam moamba, indkokla vrowolalm petham eva wanplombm. 3 Hev unna no samblasambla ovsongolnindm, aembu, owai, ata ye lelnam indkokla vrowol vivav pethana wanplombna tinam. Indhanam boasna pioa saihawol vilangini, nom ten henoi andra vinivm pivna Sesoam. Pioa hemoa saihawol vilangini hevna mira. 4 Wo kava hellena, esvema indhanamba kulohowol vina. Mara os lohnama 144,000pelara. Himba os nomini nomini indakonda tindinind, indhanamba nomba Israelnindva.

5

Yutatindinindva 12,000pelara kulohowol vina,
Rupentindinindva 12,000pelara,
Gattindinindva 12,000pelara,

Asertindinindva 12,000pelara,

Naptalitindinindva 12,000pelara,

Manasetindinindva 12,000pelara,

Simeontindinindva 12,000pelara,

Livaitindinindva 12,000pelara,

Isakatindinindva 12,000pelara,

8 Sepuluntindinindva 12,000pelara, Yoseptindinindva 12,000pelara, Bensamintindinindva 12,000pelara. Honamba indhanamba kulohowol vina, osm memba Sesoana hevna.

Esvema Plombmsna Livna Indhanamba, Sembayang Vewuvmona Venalmba Sesoamba.

9 Wo kava ona nonglana, pai, doa plombmsna lithav indhanamba esvema. Os i, esvema indhanamba, osva owai, ata an eva sevelta hemba. Himba indakonda os hind, hind, hind, eva indakonda moana, eva snatovna snatovna, eva indkumbi pethanind vavawonam. Himba di pulundthoawolvna, vevna, vuhepethalla eva sipsip pethalla. Himba vevravna dombal pikianmba tokol, wo wevtisravla noi wulluhpravna hevna englanamba. 10 Himba mindnam vevandnam umnivna, os pina Sesoa, himba senavuherava av, eva sipsip otol, hesamblangas pimba lopshawol evena.

11 Ovsongolnindva indkumbi pulningewol velohvna vuhepethalla, di ten ovsongolnindva novnamba 4pelarava lovahvna, eva ovsongolnind kuwul 24pelara lovahvna. Wo indkumbiva mulumbdandna lohvhoapramnana vuhesis, wo os sembayang vinivna Sesoamba. 12 Himba una,

Tanam, lehra pimba okuliv, eva pioa indk vethalohmanara pivna Sesoam. Manara, himba huhmohna, nowolna nonahonam av. Himba keknasowolangas wohav, nihilva henamba mendekli wohlohv sena, noinda pimba hemba okuliv.

Honamba Indhanamba Doa Vi Vovhoaprai No Kindiniva.

13 Wo mongo kuwullini ovsongolnindrini osahmanavna kam, anmund temba sna indhanamba dombal pikiannamba? Henamini himba pepra vena? 14 Ka ophona, mendekli, kava tit vev, yimba nonora lohv, annind himba. Wo no kuwul ona,

Hona indhanamba memba himba kinm lopsho vruwuvmona vevna, nomini phosohna. Himba poswol vina hevna pikian tokolva sipsip otolna tovolnana. Wo daipotava nemel dombalangas. 15 Wo doa himba mi lovahv Sesoana novlomosra. Himba sembayangmba Sesoamba velvohmanavpa sia okomba hevna tempelduvmera. Wo himba nomba temba vuherava avpa, si kokmondha vewol vevra hemba. 16 Wo no indhanamba si hengava ponmba vinvavmoa. Hemba si hengava popihava vinvavmoa. Okombasowava si hemba vinvavmoa. Owai, vuvrowol vevav, mani eva suwemba telolmba hemba. Manara, sipsip otolva hovrahovra lohv vuherava, himba si luhunvav kekalvhonindrinimsna. Himba si deisumbi-ngavra, dom pomellam, ten po puthovhoangu vevm, pomba noi ten nonapopol yunalm avm. Wo Sesoava si poswol vungeinvav yunalm wenopva hena novriniva, hengava wenopva si pruwunvavmoa.
17